O panda u panda chigant (Ailuropoda melanoleuca (Milne-Edwards, 1870)) ye una especie de mamifero de l'orden d'os carnivoros. Tot y que i hai una gran controversia a lo respecto, os zaguers estudios d'o suyo ADN l'engloban entre os miembros d'a familia d'os onsos (Ursidae), estando l'onso d'antiuellos o suyo parient mas proximo, si bien iste perteneix a la subfamilia d'os tremarctinos. D'atra man, o panda royo perteneix a una familia propia y independient: os Ailuridae. Nativo de China central, o panda chigant habita en rechions montanyosas como Sichuan y o Tibet, dica una altaria de 3.500 metros sobre o libel d'a mar.
Ye en periglo d'extinción; a especie ye muit localizada. Con 1.600 eixemplars vivindo en as selvas humidas y 188 en catividat (estatisticas 2004-2005), bells informes contrimuestran que a zifra de pandas vivindo en libertat va medrando. L'onso panda ye o simbolo d'o WWF Fondo mundial t'a protección d'a naturaleza dende 1961.
O prencipal alimento d'o panda ye o bambú (arredol d'o 99% d'a suya dieta), encara que tamién s'alimenta de fruitos, chicotz mamiferos, peixes y insectos. Ye un buen repinchador, encara que no se le gosa veyer en os arbols. S'adapta a la catividat y gracias a la suya pelleta puede suportar facilment as condicions hibernals d'o suyo habitat.
