Lobo

Вовк, вовк обычайный (Canis lupus L.) — найвекшый з нынѣ жиючых драпежных ссавцьох родины псовых, котрый здобывать ѣдло самостатно або во фалках активным гледаньом ай пренаслѣдованьом жертв.^[1]

Ареал

В Дании, Голландии, на Британскых островах быв долабы вынищеный, в Западной Европѣ доднесь заховав ся в Арденах, Юрѣ, на югу Франции, в Италии, на Балканском полуостровѣ, в Мадярщинѣ, Польщи, Финландии, на цѣлой територии бывшой Российской империи. В Чехии быв послѣдный вовк застрѣленый в року 1850, але все еще даякый ся може затуляти з Карпат. Росширеный по цѣлой Азии, Японскых островах и цѣлой Сѣверной Америцѣ, хоть його кожух подлѣгать розличным змѣнам в приспособлѣню ку краинѣ и климѣ.^[1]

Вонкашность и сохташ

Вовк европскый бывать тѣлом 115 цм довгый, в плечах 85 цм высокый, пысок мать приостреный, ушны клапы широкы, шпицасты, взпрямлены, очи кус накосо положены, пупилькы круглы, лабы высокы, хвост звислый. Вовк е вытрималый гонитель, там де ся указуе гойнѣйше, гонить жертву во фалках обдуманым гоном и чинить великы шкоды на высокой звѣринѣ и стадах. Все небеспечный про дѣти, а кедь голод му додавать дерзости, и про доростлых. Преслѣдуе и лишкы, а в тѣснотѣ ай мыши и жабы, не оповергать ани здохлинов. Протягле вытя вовка выволуе у жертвы горор, а е то ай вовчый способ комуникации. Вовци можуть давати плодне потомство зоз псами. Парять ся од децембра по апрѣль. В том часѣ меджи самцями суть рвачкы на живот а на смерть. По 13 тыжднях вовчицѣ принесуть од 6 до 10 молодят, котрых пестують в норах, скалных пуклинах, в лѣсовых заломах. Молодя, взяте од вовчицѣ, дасть ся здомашнити.^[1]

Жерела и одказы

• Ottův slovník naučný. Illustrovaná encyklopaedie obecných vědomostí. Díl 26. Vyd. J. Otto. V Praze, 1907.

Референции