El pisacàn (o radìcio de can) (nome sientifego Taraxacum officinale) el xe na pianta deła fameja dełe Compositae, pi de preciso dełe Asteraceae.
In todesco el se ciama Loewenzahn, in inglese dandelion, in taljàn tarassaco, dente di leone o soffione. El ga dełe fojete coi bordi tuti tajà a formar come dei "denti" a punta (da qua el nome in taljàn e todesco). Ste foje łe vien su tute insieme dała tera e łe fa dełe rosete. In sima al pecol, da apriłe a otobre, sbocia el fiore tipico zało, ke ała fine el se trasforma in na bala tonda e bianca de pełuki: basta sofiarghe sora e i scapa via tuti (da qua l'altro nome in taljàn).
Łe foje łe ga tanti sałi minerałi e vitamine. El pisacàn el se ciama cusì parchè el ga anca na bona atività diuretica.
In cusina se dopara łe foje tenare deła primavera, mejo se prima ke vegna su i fiori. Se pol magnarle crue in sałata o cote con toketi de łardo o metarle 'ntel risoto (risi e radici). I buti, prima ke se verza i fiori, i se mete via sotaxeo, come i càpari.
