African Lion

Shumba kana mhondoro (Lion in English) imhuka iri pamupanda wekatsi inowanikwa kumatunhu ari kuAfrica neAsia. Shumba inokura kusvika 250 kg; inoverengwa seimwe yemhuka dzine huwandu huri huderera kunyanya munzvimbo dziri kuMadokero eAfrica. Kutambanuka kuri kuita nzvimbo dzinogarwa nevanhu ndicho chimwe chikonzero chiri kuita huwandu hweshumba huderere. Varimi vane mhuka dzavo havafare kana zvipfuyo izvi zvichidyiwa neshumba.

Magariro

Shumba dzinorarama makore gumi kusvika gumi nemana (10-14) kana dziri musango. Kana dzakatenherwa dzinorarama makore akati rebeyi anganosvika makumi maviri (20). Shumba hono hadzirarame makore anopfuura gumi kana dziri musango nokuda kwekurwa kwadzinogaro ita dzichitanda nzvari.

Shumba dzinowanikwa mumakura eSavanna asina miti yakawanda, asi dzimwe nguva dzinopinda murimuka mumasango makuru. Mhuka idzi dzinogara mumatanga anenge aine nzvari dzine ukama, vana veshumba, nehono shomane. Vanotarira shumba vanoti hadzinyanye kuvhima vanhu.

Kuvhima

Zvinotora danga reshumba kuti dziwise mukono wenyati; kana nepo shumba dzinozowisa mukono uwu dzatombotambura nokutungwa dzichidzinganiswa nenyati. Mapere zvakare anoita chivindi chokudzinga shumba kuva panyama zvikurusei kana mapere auya ari danga rakakura. Bere kamhuka kadiki asi kana achinge awanda anorura zvokushayisa shumba mufaro panyama.

Tsika

Shumba imhuka inotyiwa nevazhinji; matehwe eshumba aipiwa kuvatongi vakuru kuratidza kuremekedzwa nehukuru hwavo. Munzvimbo zhinji mune zvifananidzo zveshumba zvinoratidza kuremekedzwa kwemhuka iyi.

MuZimbabwe kuState House kunogara President Emmerson Dambudzo Mnangagwa kune zvifananidzo zveshumba zviviri. Pamatumba akavigirwa madzimambo ekuEgypt pane chifananidzo chine musoro wemunhu nemuviri weshumba chinonzi Sphinx. Chiumbwa ichi chiri pedyo nedumba riri paGiza, Egypt. Muguta guru reHarare panze peMeikles Hotel pane zvifananidzo zveshumba zvakare.

• Chitehwe (maneless lion) apa kureva shumba isina zenze.

Kurerutsa Mutauro

• Kana shumba ikashaya nyama inodya uswa.
• Jesu Kristu ndiye shumba yerudzi rwaJudah.
• Taona muhwezva wechaizvuviwa neshumba: we saw the trail of something that had been dragged by a lion.
• Payakanzwa mitsindo, shumba yakadzambanuka pachitunha: when it heard the sound of feet, the lion got from over the corpse of its kill.
• Kuhwarira (to lie in wait for ambush, lurk) izwi rinotaurwa kuChiNdau rinoreva kuhwandira nechinangwa chokurwisa. Zvichida ndipo panobva zita rokuti Hwarare?
• .... Vasati vaguma pashi murindi, mhondoro dzakavanyisa: And before they reached the floor of the den, the lions overpowered them. (Daniel 6:24, Bhaibheri reChiNdau).

Tsumo

• Kana shumba ikashaya nyama inodya uswa. When a lion fails to find meat it eats grass.

Mitauro yeBantu

• VaNyungwe vanoti mpondolo (n. lion) kureva mhondoro.
• Vatauri veSwahili vanoti simba kureva shumba. Barawani vanoti siimba (n. lion) kureva shumba.
• Baila vanoti shumbwa kureva shumba.
• MaZulu vanoti ingonyama (n. lion) kureva shumba.