Anifail o drefn y cnofilod (Rodentia) yw'r wiwer goch (Sciurus vulgaris). Mae'n byw ar draws rhannau helaeth o Ewrop a gogledd Asia.
Mae'r Wiwer goch tua 19 – 23 cm i hyd heb y gynffon, sydd tua 15 – 20 cm o hyd; ychydig yn llai na'r Wiwer lwyd. Ar ynysoedd Prydain ac Iwerddon, mae niferoedd y Wiwer goch wedi gostwng yn fawr ers i'r Wiwer lwyd (Sciurus carolinensis) gyrraedd o Ogledd America.
Yng Nghymru, mae Ynys Môn yn parhau i fod yn un o gadarnleoedd y Wiwer goch, ac yn y blynyddoedd diwethaf bu ymgyrch i ddifa'r Wiwer lwyd o'r ynys i roi cyfle i niferoedd y Wiwer goch gynyddu. Ceir hefyd boblogaeth yng Nghoedwig Clocaenog.
