الأسماء في صفحات التنقل
ზიკაშ ვირუსი (ინგლ. Zika virus, ZIKV) — Flavivirus ტიპიშ ვირუსიშ გვარობა (ფანია Flaviviridae), ნამუთ Aedes ტიპიშ კოღოეფს გინმუღუნა. ადამიერეფს ალახენს კინ თე ჯოხოდვალაშ ლახარათ, ნამუშოთ დჷმახასიათაფალი რე გიმორღვაფა, უჭყანობა, დუდიშ დო სახსარეფიშ ჭუა, სინჩხეშ მეჩამა, სახსარეფიშ შინაფა. ვირუსის მაართაშე მიოგორედს 1947 წანას, ნამუშ უკული 60 წანაშ გოძვენა, ხვალე 15 მოხვალამა რდჷ ეჭარილი თე ვირუსით დალახებაშ გეშა აფრიკას დო ობჟათე-ბჟაეიოლ აზიას. 2007 წანას, იაპიშ კოკეფშე ვირუსიქ გიფაჩჷ ბჟაეილჸურე რჩქალი ოკიანეშით. 2014 წანას, ვირუსიქ გიფაჩჷ ახალ კალედონიას, კუკიშ კოკეფს, საფრანგეთიშ პოლინეზიას, 2015 წანას — თანაფაშ კოკის დო ობჟათე ამერიკას, ცენტრალური ამერიკას, ვესტ-ინდოეთის. ასეიან ბორჯიშო ვირუსის პანდემიაშ სტატუსი უღუ. ზიკაშ ვირუიშ ლახარა მოგენს დენგეშ ლახარაშ ქექე ფორმას, თაშნეშე ჸვინთელ ლახარას დო ბჟადალი ნილოსიშ ლახარას. ვირუსიშ სააწმარენჯო სპეციფიკური წამალეფი ვარდა ვაქცინეფი ვა არსებენს.
