She lus 'sy chynney Asteraceae ee cabbag ny h-awin (Tussilago farfara). Va ymmyd lhee jeant jee rere tradishoon, agh ta oayllee er ngeddyn alkaloydyn pyrrolizidine nieunagh assjee.
She lus lussagh sheer-vio t'ayn, as t'ee skeaylley liorish raisoamyn as rassyn. T'ee ry-akin dy mennick myr coloin ass ymmodee lossreeyn. T'ee 10-30cm er yrjid.
T'ee çheet my vlaa 'syn arragh roish my ta duillagyn eck, eddyr Toshiaght Arree as Averil, er gass y pheesh. Ta'n blaa gollrish blaa lus ny minnagh beg yinnys dhossan resh clooieagh rish appeeaght. Ta'n pappus clooieagh skeaylley ny rassyn ec y gheay. Ta'n rass hene mysh 3mm er lhiurid, ny rollian buigh ny ruy, as asnaghyn coheeynt rish.
Ta ny duillagyn anmagh gaase tra t'ee skeaylley rassyn. T'ad gaase er gish elley, ass buinney elley, as wheesh as 30cm er yrjid. Ta duillag lomarcan ec dagh gass. T'eh 10-20cm er lhiurid, cree-chrooagh ny kiarkylagh, as ta feeacklyn mooarey ec yn oirr echey. Ta fynney meein bane as cuishlinyn bassagh er yn eaghtyr s'inshley echey' ta'n eaghtyr s'yrjey rea as glass.
Ta cabbag ny h-awin dooghyssagh ta'n Oarpey as yn Aishey, as t'ee jeant dooghyssahg ayns buill ayns America Hwoaie as America Yiass.
Va ymmyd lhee jeant jee.[1] Ta gallane millish cabbag ny h-awin jeant jee ec Stockley's Sweets 'sy Reeriaght Unnaneyssit.
Ta alkaloydyn pyrrolizidine 'sy lus, as niart gientynagh kanghyr oc.[2] Ta feanish ayn jeh drogh-eiyrtyssyn, goaill stiagh çhingys aane ayns lhiannoo diu tey cabbag ny h-awin, as lhiannoo hooar baase erreish da'n voir echey iu y tey rish torraghys.[3][4] Ren reiltys ny Germaan neulhiggey da sleih creck cabbag ny h-awin, as ren oayllee croo arraghys noa, Tussilago farfara Wein, gyn alkaloydyn pyrrolizidine. [5] Ta'n arraghys shoh cooilleeney femeyn quallid slattyssagh.[6]
She lus 'sy chynney Asteraceae ee cabbag ny h-awin (Tussilago farfara). Va ymmyd lhee jeant jee rere tradishoon, agh ta oayllee er ngeddyn alkaloydyn pyrrolizidine nieunagh assjee.
