燕科

Os hirundinidos (scientificament, en latín, Hirundinidae) son una familia de paixaros de chicota mida, d'entre 11 y 22 cm de lonchitut corporal, con alas largas con os extremos en punta, muit capables ta o volido y con gran capacidat maniobradera. Lo cuerpo el tienen fusiforme y á sobén as plumas d'a coda las i tienen bifurcadas. O pizco el i tienen curto, poco protuberant en respecto á la cara, pero como tienen mandibulas amplas el pueden obrir con un anglo important quan cazan. Totas as especies concabidas en a familia son insectivoras, depredaderas d'invertebraus que pueden cazar quan vuelan.

Son animals cosmopolitas, con destribución quasi global, anque muitas especies son migraderas en latitutz temperadas y subtropicals. Per a suya buena traza ta o volido, pueden viachar milenta kilometros en as suyas migracions. Bellas especies fan, anyalment, migracions intercontinentals entre Europa y Africa, Asia y Oceanía u Nordamerica y Sudamerica. Una altra caracteristica de bells hirundinidos ye la construcción d'os suyos niedos, que qualques especies penchan d'os rafes de lenatos y tellaus. Belaltras, manimenos, es fan soterranios, excardando galerías en tierra en os terreros y marguins sedimentarias.

Nombre

En aragonés, como tamién pasa con belaltras luengas romanicas, os hirundinidos reciben bells nombres que les son chenericos, y con freqüencia no designan garra especie concreta sino que s'emplegan ta nombrar o tipo morfolochico cheneral que totas ellas presentan, fendo que pueda asumir-se como denominación millor significadera ta tota la familia que no ta destinguir garra especie. En iste sentido, os nombres que se gosa sentir incluyen formas como volandrina (encara en uso en muitos nuclios de Ribagorza^[1][2] y Sobrarbe) y bells derivaus («gulundrina» en Rodellar^[1] (Semontano de Balbastro), «vulundrina» en Luesia^[1] (Cinco Villas) y Pandicosa^[1] (Alto Galligo)) y golondrina/golandrina,^[1] muit chenerals en Aragón. Totas ixas formas dimanan d'o nombre latín ta istes animals, <HIRUNDO, á traviés de formas deminutivas d'o tipo HIRUNDINA, que posteriorment en a evolución fonetica habrían adquiesto una consonant velar inicial ta refirmar a suya pronunciación, como ye normal en aragonés: «gurundina» ye una forma arcaica hipotetica que gosa plasmar ixe fenomén. D'alcuerdo con isto, as formas «gulundrina» y relativas serían as orichinals en aragonés, y as formas que han sustituido ixa consonant con una /b/ (v) l'habrían feito per conexión con o verbo «volar».

Nombres con aspecto de catalanismo lexico (como «aurineta» u «engrineta», en catalán estándar «oreneta») s'han puesto decumentar en municipios de parlar catalán, en a Francha de Levant, como Zaidín^[1] y Ontinyena,^[1] y anque suelgan apareixer en os lexicos aragoneses no s'han de considerar pas como parolas patrimonials d'a luenga aragonesa, sí que d'a catalana en Aragón.

Imáchens

• Delichon urbica

• Hirundo rustica

• Riparia riparia con os niedos en forma de galería

• Delichon urbica recullendo archila ta fer-se niedo

• H. rustica volando

• Niedo de D. urbica

• H. rustica

• Petrochelidon pyrrhonota

Referencias