Bittersweet, Woody Nightshade

Hórkosłódke wrónidło (Solanum dulcamara) je rostlina ze swójby wrónidłowych rostlinow (Solanaceae).

Wopis

Hórkosłódke wrónidło je kerk, kotryž docpěwa wysokosć wot 30 hač 200 cm. Rostlina je deleka wodrjewjena.

Hałuzy su wisace abo lězuce, słabje wijace.

Łopjena

Łopjena su měnjate, jara wariabelne, jejkojte, špisojte, wuchate abo rozdźělnje lapate. Srjedźne łopjena su často lapate.

Kćenja

Kćěje wot junija hač awgusta. Kwětnistwa su přewisowace a hranaće rozhałuzowane. Wioletne kćenja docpěwaja wulkosć wot něhdźe 1 cm. Jich kónčki su často wočinjene a njesu napadne próškowe łopješka. Króna su pjećdźělna, płonje rozšěrjena a docpěwa šěrokosć wot 1 cm.

Płody

Płody su jejkojte, čerwjene, wisace jahody. Wone wobsahuja jědojte saponiny a alkaloidy.

Stejnišćo

Rosće we włóžnych kerčinach, na hrjebjowych kromach, rěčnych brjohach a lěsnych zahonach.

Rozšěrjenje

Rostlina je w nimale cyłej Europje rozšěrjena.

Nóžki

1. ↑ W internetowym słowniku: Nachtschatten

Žórła

• Schauer - Caspari: Pflanzenführer für unterwegs, ISBN 978-3-8354-0354-3, 2. nakład, 2008, strona 290 (němsce)
• Spohn, Aichele, Golte-Bechtle, Spohn: Was blüht denn da? Kosmos Naturführer (2008), ISBN 978-3-440-11379-0, strona 208 (němsce)

Eksterne wotkazy

Hlej wotpowědne dataje we Wikimedia Commons:
Hórkosłódke wrónidło

• Jědojtosć (němsce)
• Wopis rostliny (němsce)