Chicory

Wšědna změrniwka (Cichorium intybus) je rostlina ze swójby zestajenkowych rostlinow (Asteraceae).

Wopis

Wšědna změrniwka je trajne zelo, kotrež docpěwa wysokosć wot 30 hač do 150 cm. Rostlina wobsahuje běłu mlóčnu mězu.

Korjeń je sylny.

Łopjena

Spódnje łopjena su lancetojte, zwjetša jara rozdźělene a ćmowozelene. Stołpikowe łopjena su małke, šěroko-lancetojte, cyłokromne abo zdaleno zubate. Łopjena su nahe abo na delnim boku prosće kosmate.

Kćenja

Kćěje wot julija hač do oktobra. Kćenjowe hłójčki su stołpikate abo sedźace, steja bóčnje a na kóncach hałuzow a docpěwaja šěrokosć wot 3 hač do 5 cm. Króny su jazyčkojte. Wobalka je walcojta. Zwonkowne łopješka su krótke, wotstejace, mjeztym zo znutřkowne su zrunane.

Hłójčki so wokoło 6. hodźiny puka a so wokoło popołdnišeho časa začinjeja.

Płody

Płody maja krótki papus.

Stejnišćo

Rosće na pućnych a rólnych kromach, na pustych płoninach a na pastwach. Preferuje zwjetša suche, wotewrjene, wutkate pódy. Znjese tež sól.

Rozšěrjenje

Rostlina je w nimale cyłej Europje rozšěrjena.

Wužiwanje

Rozdźělne warjetety so kultiwuja.

• Korjenjowa změrniwka da inulin za cyrobu diabetikarjow.
• Chirocee a radicchio so wužiwatej za solotej.

Nóžki

1. ↑ Pawoł Völkel: Prawopisny słownik hornjoserbskeje rěče. Hornjoserbsko-němski słownik. Ludowe nakładnistwo Domowina, Budyšin 2005, ISBN 3-7420-1920-1, str. 660.
2. ↑ W internetowym słowniku: Wegwarte

Žórła

• GU Naturführer Blumen, ISBN 3-7742-1507-3, strona 30 (němsce)
• Schauer - Caspari: Pflanzenführer für unterwegs, ISBN 978-3-8354-0354-3, 2. nakład, 2008, strona 332 (němsce)
• Spohn, Aichele, Golte-Bechtle, Spohn: Was blüht denn da? Kosmos Naturführer (2008), ISBN 978-3-440-11379-0, strona 224 (němsce)

Eksterne wotkazy

Hlej wotpowědne dataje we Wikimedia Commons:
Wšědna změrniwka

• Wšědna změrniwka. W: FloraWeb.de. (němsce)