Мышь домова, (лат.) Mus musculus — дробный грызун, из родины мышовых (Muridae), котрый росширив ся, слѣдом за людми, по цѣлой земской кули. Домова мышь — типовый шкодник.
Довжка тѣла 9 цм., хвоста — 9 цм. Ушны клапкы, прикладены, сягають аж ку очом. Хвост мать аж до 100 кружкы, кожушок еднофаребно сѣдый. Мать стойкый шпецифичный «мышачый» запах.
Домова мышь здержуе ся в людском обыстю або коло него. Даколи ся кормила насѣньом и орѣхами, а в сучасности всеѣдна: пожере хотьяку ростлинну або живинну поживу. Влѣтѣ мыши можуть ся кормити на поли и в загородѣ, але восени ся вертають до огрѣваных мѣст. Вонка кормлять ся вночи, але в людском бываню ся приспособлять ку людям и кормлять ся, коли люде сплять, або не суть дома.
Хоть мышь мать барз добры слух, пах и пыт, барз осторожна и шиковно ся спряче и утѣкне, але мать доста низкый интелект и дасть ся легко имити в мышоловку. Найлѣпше ся имить на помащеный хлѣб и сѣменець, а не на солонину, як ся обычайно звыкло думати.[1]
Живучость вида в первом рядѣ вызначена его высоков плодностев. Домовая мышь ся годна плодити в каждой порѣ рока. Малы ся родять на 21. день по зачатю, в числѣ 4 аж 6, але даколи и до 10, голы и слѣпы. На 10. день уж суть в кожушку, на 14. день ся им отворять очи, а на 21. день уже суть самостойны и розселяють ся. Молоды мыши, кедь суть двохмѣсячны, годны ся уж плодити. Мышь домова жие еден аж повдруга рокы.
Мышь домова, (лат.) Mus musculus — дробный грызун, из родины мышовых (Muridae), котрый росширив ся, слѣдом за людми, по цѣлой земской кули. Домова мышь — типовый шкодник.
