小扁豆

Toś ten nastawk z temu družyna (Lens culinaris) jo pó lema na drugi nastawk pódobny. Drugi lema sok (Lens) ma temu rod.

Sok^[1][2] (Lens culinaris) jo rostlina ze swójźby łušćinowych rostlinow (Fabaceae). Wón jo stara kulturna rostlina z orienta.

Wopis

Sok jo jadnolětna rostlina, kótaraž dośěgnjo wusokosć wót 30 až do 50 cm.

Łopjena su w porach pjerinate a se zwětšego w wijankach kóńce.

Małke, namódry běłe kwiśonki stoje pó jadnom až pó tśoch w granach w rozporach.

Płody a semjenja

Płone semjenja sejźe zwětšego pó jadnom až pó dwěma we łušćinach. Wóni su platśojte, zelenojśe-brune až carne abo cerwjenojte a pśinjasu na bělkowinach a wuglowych hydratach bogatu zeleninu.

Stojnišćo

Rosćo w suchem a śopłem klimje.

Rozšyrjenje

Rostlina jo ako kulturnu rostlinu w Europje wót młodokamjentneje doby dopokazana.

Wužywanje

Semjenja se zwětšego njebělone warjone jěźe.

Ze semjenjow se teke muka zgótuju, kótaraž móžo ako pśidawk pśi klěbpjacenjeju słužyś.

Zele a słoma stej na bělkowinach bogatu skótnu žratwu.

Stawizny

W starych kulturach w Mezopotamiskej, Egyptojskej, Persiskej a Israelu jo był ludowy carobowy srědk.

Wót bronzoweje doby su znate kulturne formy z wětšymi semjenjami.

Nožki

1. ↑ ^{1,0 1,1 1,2} Starosta: Dolnoserbsko-nimski słownik, Niedersorbisch-deutsches Wörterbuch, Bautzen 1999, ISBN 3-7420-1096-4, bok 458
2. ↑ ^{2,0 2,1 2,2} W internetowem słowniku: Linse

Žrědła

• Jugendlexikon Biologie, 1988, ISBN 3-323-00043-9, bok 208 (nim.)
• Meyers Taschenlexikon Biologie, In 3 Bänden, 2. zwězk, ISBN 3411-12023-1, boka 144-145 (nim.)
• Ullstein Lexikon der Pflanzenwelt, 1973, ISBN 3-550-16019-4, bok 268 (nim.)