Foraminìfer

Foraminifera utawi asring dipunwastani foram inggih punika salah satunggaling organisme sèl satunggal ingkang gadhah thothok kalsit lan asring kawastanan rhizopoda (suku semu).^[1] Foraminifera kalebet golongan ageng saking krajan protista kanthi pseudopodia.^[2] Foraminifera mèmper kaliyan amoeba, nanging amoeba boten gadhah thothok kados foraminifera kanggé ngayomi protoplasmanipun.^[1] Cangkang utawi kerangka saking foraminifera saged dipundadosaken pitedah kanggé ngupadi sumber daya lenga, gas alam, kaliyan mineral ing salebeting bumi.^[2] Cangkang foraminifera ngandhut kalsium karbonat (CaCO3).^[3] Manawi foraminifera mati, thothokipun lajeng mbentuk siti (tanah) globerina.^[3] Siti punika ingkang fungsinipun dados pitedah wontenipun sumber lenga.^[3] Foraminifera angsal panganan saking kasil fotosintesis alga ingkang nindakaken simbiosis wonten ing sangandhaping thothok foraminifera.^[3] Foraminifera padatanipun gesang wonten ing segara.^[3]

Klasifikasi

Jinis-jinis foraminifera punika manéka werni. Foraminfera dipunklasifikasikaken miturut wangunipun thothok kaliyan miturut caranipun gesang.^[1]

Miturut wangun thothok

Miturut wangun thothokipun, foraminifera dipunpérang dados 3, inggih punika:

• Arenaceous (Foraminifera ingkang thothokipun pasiran).^[1] Padatan pinanggih ing tlatah ekstrim, kados ta banyu payau utawi segara pérangan jero.^[1] Dipunwastani pasiran amarga wangunipun lumah thothok katingal kasar kados kepyuran gendhis pasir.^[1]
• Porcelaneous (Foraminifera ingkang thothokipun gampingan tanpa pori).^[1] Padatanipun gesang kanthi cara solitèr, inggih punika mblusukaken thothokipun ing salebeting sédhimèn, kejawi tutugipun (aperture) ingkang methungul ing lumah sédhimèn.^[1]
• Hyalin (Foraminifera ingkang thothokipun gampingan wonten porinipun).^[1] Foraminifera jinis punika gadhah variasi wangun thothok ingkang kathah sanget, kados ta lampu kristal kanthi ornamen ingkang njlimet, bening, kaliyan kinclong.^[1]

Miturut caranipun gesang

Miturut caranipun gesang, foraminifera dipunpérang dados 2, inggih punika:

• Feraminifera plantonik, gesang ing tlatah banyu kaliyan kasebar ing segara-segara tarbuka kanthi jeronipun banyu langkung saking 10 mèter.^[1]
• Feraminifera bentik, gesang ing lapisan sédhimèn ngantos jeonipun puluhan sèntimèter.^[1]

Cathetan suku