O charlo[1] u charro[1] (nombre scientifico: Turdus viscivorus (L., 1758)), nombres que coexisten con griba en aragonés ribagorzano,[1] ye un au paseriforme d'a familia Turdidae y o chenero Turdus.
Ye reconoixible por a suya mida (ye la especie más gran d'o chenero Turdus en Europa[2]), as alas y o dorso grisos, y por a suya canta, pareixida anque más monotona que a d'una merla. En Espanya se considera especie cinechetica.[2]
O charlo ye una torda graniza, de 26 cm de largaria y d'entre 100 y 125 gramos de peso.[2] Tiene o dorso, a cabeza y a parte superior d'as alas de color grisa, y o papo y a tripa blancas picudas con marrón u griso. As alas son blancas por debaixo, y quan vuela se le vei a tripa blanca dende o suelo.
O charlo vive y fa o niedo en zonas forestals a on que as selvetas y corroldes d'arbols s'intercalen con espacios ubiertos, os quals prefiere pa alimentar-se. Fa niedo en una forca entre dos ramas, siempre alto en os árbols.
Se'n troba a sobén en huertas y espacios humanizaus.[2] Manimenos, ye un paixaro timido y siempre presto a fuyir, por o que anque sía un animal numeroso costa de viyer-lo.
Pasa más tiempo que atras especies de tordas en o suelo, de forma parella a como lo fa una merla, y pareix que quan se desplaza por tierra lo fa de forma más erguida.[2]
Como todas as especies Turdus, o charlo ye omnivoro con preferencia por os invertebraus, como insectos, cucos y larvas. Devoran os limacos y os caragols, por o que gosa estar una especie bien buena pa los hortals que freqüenta.
Quan os insectos faltan, mincha fruitos y bayas. O suyo apelativo scientifico viscivorus («devorador de visca») fa referencia a la freqüencia con que mincha lulos d'ixa planta epifita, más que más en l'hibierno.[2] A simient d'a visca amenista que la dichieran y la caguen pa poder naixer, por o que as tordas que fan isto fan parte necesaria d'o suyo ciclo reproductivo.
Ye una especie fura con atros paixaros, y poco sociable con os d'a suya mesma especie. De regular va solo, anque en l'agüerro y l'hibierno se'n puede trobar que vaigan chuntos, en pantilla, a mirar-se l'alimento.[2]
O charlo u charro (nombre scientifico: Turdus viscivorus (L., 1758)), nombres que coexisten con griba en aragonés ribagorzano, ye un au paseriforme d'a familia Turdidae y o chenero Turdus.
Ye reconoixible por a suya mida (ye la especie más gran d'o chenero Turdus en Europa), as alas y o dorso grisos, y por a suya canta, pareixida anque más monotona que a d'una merla. En Espanya se considera especie cinechetica.
