Ilvekset

Lynx (Kerr, 1792) ye un chenero de mamiferos placentarios carnivoros d'a familia d'os felidos, subfamilia d'os felins. En aragonés reciben o nombre tradicional de cervals y o popular de linces.

Caracteristicas

Os cervals son felins de mida mediana, como as de as diferents razas de cans, con coda curta. As suyas dimensions bailan dende as d'o cerval iberico, de 45 cm en a cruz y bells 15 kg de peso, dica lo cerval europeu (Lynx lynx), que arriba a fer 70 cm en a cruz y pesar 30 kg.

Todas as especies de Lynx tienen una barba de pels más largos arredol d'as galtas y dos flequichons de pelo negro en a punta d'as orellas, que pareix que augmentarían a suya audición.

Quasi todas as especies son cazataires oportunistas, que capturan presas de midas muit diferents, especialment aus y mamiferos menors. Manimenos, o cerval iberico caza principalment conillos, que forman un porcentache altismo d'a suya dieta. Ista dependencia d'os lagomorfos ye una d'as causas de que sía en periglo d'extinción.

A especie más distribuida cheograficament ye Lynx lynx, que habita en buena cosa d'Europa y Asia. Manimenos, ye la más forestal de todas as especies y ye un animal muit timido y dificil de veyer. Lynx rufus ye un oportunista que habita en espacios ubiertos, selvas u disiertos, y s'amana si cal en os arredols d'as poblacions humanas. Lynx canadensis tiene costumbres parellanos a Lynx lynx y vive en selvas de coniferas y en as taigas d'America d'o Norte. Y Lynx pardinus habita en paramos y matullars d'estrepas tipicos d'o sud d'a Peninsula Iberica.

Imáchens

• Lynx lynx

• Lynx rufus

• Lynx canadensis

• Lynx pardinus

• Cadiello.

Zoonimia

En o "Libro d'el Trasoro" los consideran una variant d'o lobo, dita lubrena u çerual (ye dicir cerval). En o lexico comercial aragonés d'o sieglo XV se documenta o zoonimo lobo cerval.