Die klein gekolde kat, ook bekend as swartpootwildekat of miershooptier (Felis nigripes) is 'n klein wildekat wat voorkom in Suid-Afrika, Namibië, Botswana en gedeeltelik in Zimbabwe.[3]
Die soogdier is die kleinste van al die katsoorte in die streek. Die kleur wissel van 'n gelerige kaneelbruin in die suide tot ligte geelbruin in die noorde van die gebied waarin hulle voorkom, met verspreide strepe en kolle. Agter op die nek en rug is vier swart strepe waarvan die buitenste twee afdraai oor die skouers. Dié strepies is dikwels verdeel in korter strepies of kolle. Die stert is kort en om die keel is drie ringe. Dié kat is kleiner as die vaalboskat en die strepe en kolle is duideliker. Die mannetjies (1,5-1,7 kg) is effens swaarder as die wyfies (1-1,4 kg).
Die katte verkies droë gebiede met ooptes en 'n bietjie lang gras of struike. Hulle eet hoofsaaklik muise en spinnekoppe asook reptiele, insekte en voëls.
Die katte is nagdiere wat eers ná donker uitkom. Hul lewensduur is onbekend. Hulle is meestal alleenlopers en beweeg veral op die grond, maar kan goed boomklim. Hulle vlug in die bome in as hulle gejaag word. Bedags slaap hulle in erdvark- of springhaasgate, miershope of onder struike. Die katte is aggressief vir hul grootte en kom nog buite bewaringsgebiede voor. Een tot drie kleintjies word tussen November en Desember gebore ná 'n dratyd van ±2 maande. Hul natuurlike vyande is die leeu en luiperd.[4]
Die klein gekolde kat, ook bekend as swartpootwildekat of miershooptier (Felis nigripes) is 'n klein wildekat wat voorkom in Suid-Afrika, Namibië, Botswana en gedeeltelik in Zimbabwe.
