She lus 'sy chynney Asteraceae eh cardoon (Cynara cardunculus). She mooinjer dooghyssagh onnane vlasstal t'ayn, as shimmey troarag t'echey. T'eh dooghyssagh da'n Oarpey heear as Meanvooiragh.
She lus sheer-vio lussagh t'ayn. T'eh gaase wheesh as 1.5m er yrjid. Ta duillagyn babbanagh glassey ny leeah-ghlassey echey, wheesh as 50cm er lhiurid, as jialgyn mooarey orroo. Ta ny blaaghyn gorrym-jiarg reaghit myr pseudanthium as ta jialgyn foawragh nyn mast'oc. Ta'n pseudanthium wheesh as 6cm er crantessen.[1][2][3][4]
Share lesh ardjyn çhirrym, sheear dys yn Varoc as yn Phortiugal, shiar dys Yn Libya as yn Ghreag, as twoaie dys yn Chroit as y Rank yiass. T'eh ry-akin 'syn Cheeprey, ny h-Ellanyn Canaaragh as yn Vadeirey myrgeddin, as dooghyssagh daue, foddee.[5] She sarkyl t'ayn ayns pampas ny h-Arjenteen, yn Austrail as California.[4]
Myr troarey 'sy Reeriaght Unnaneysit, chossyn y lus Award of Garden Merit liorish y Royal Horticultural Society.[6]
Ta daa phossan troarag ayn. Ta cardoon hene (Cynara cardunculus, cocheayllagh rish C. cardunculus arr. altilis DC) er ny reih son gish duillag yn-ee. Ta onnane vlasstal (Cynara cardunculus possan Scolymus, cocheayllagh rish Cynara scolymus ny C. cardunculus arr. scolymus (L.) Fiori) er ny reih son buinnaghyn blaaghey yn-ee. Ta'n daa hroarag ny smoo na'n lus feie; cha nel monney jialgyn oc, as ta ny gish as blaaghyn ny smoo, myr shen ta troar smoo ry-gheddyn assdaue as t'eh ny sassey ad y chur stiagh.[1][7] Cha nel monney scansh eddyr y jees oc as cardoon feie, as ta niart crosh-heelree eddyr oc. S'doillee daue crosh-heelraghey marish dooieyn Cynara elley.[1]
Share da amm aase feayr as liauyr, mysh queig meeghyn, agh cha nod eh shassoo noi rio. Ta feme echey er rheamys mooar, as myr shen cha nel eh goll er troarey monney agh raad ta aggyrtys ynnydagh er.
Ta jialgyn beggey do-akin, bunnys, er gish chardoon, as t'ad guinnagh dy liooar. Ta troaragyn gyn jialgyn er nyn droarey noi shen, agh bare dhyt kiarail y ghoaill gyn scansh da'n troarag t'ayn.
Dee ad cardoon 'sy Çhenn Ghreag, 'sy Çhenn Raue as 'sy Çhenn Phershagh. Ta feanish ayn jeh'n cherroo eash RJC liorish Theophrastus, myr κάκτος (Ladjyn: cactus), agh cha nel enney y lus shen cruinn.[1] V'eh ry-akin 'syn Oarpey mean-eashagh as jeianagh leah, as ayns America rish amm ny coloinyn. Hie eh ass fashan anmagh 'sy 19oo eash, agh t'eh goll er troarey foast 'sy Rank, y Spaainey as yn Iddaal. Ayns ard Geneva, ta troarag ynnydagh 'Argenté de Genève' ('Cardy') ny sur-vee ynnydagh.[8] T'eh cadjin dy liooar 'syn Affrick hwoaie, ayns couscous Algeeragh as Tooneeshagh.
Ta ny buinnaghyn yn-ee, as t'ad goll er ee 'syn Iddaal yiass as 'sy Çhissyl.[9] Ayns buill elley, t'ad gee ny gish son y chooid smoo.
Ta ny gish goll er çhaglym 'sy yeurey as yn arrey, kiart roish blaaghey.[7] Ta'n blass orroo gollrish blass onnane vlasstal.
"Roish my çhaglym cardoonyn son y voayrd, ta shin giallaghey ad liorish co-chiangley ad as filley coonlagh mygeayrt oc, as kiangley eshyn mygreddin, as faagail ad rish tree shiaghteeyn."[10]
T'ad geddyn ensymeyn ass cardoon dys jannoo caashey feill-haghnagh. Ta caashey tradishoonagh ny Portiugal jeant jeh'n vinjey shoh ynrican, myr sampleyr, Queijo de Nisa.
T'eh goll er troarey myr lus jesheenagh, as ta blaaghyn mooarey as glasseraght yial ec troaragyn jesheenagh.[4]
'Sy 21oo eash, t'ad cur geill da myr bun bea-gheesyl. Ta ooill ry-gheddyn ass ny rassyn echey, as t'eh gollrish ooill lus ny greiney. Hooar ronsaghey dy vel eh ny share na ooill reap bentyn rish cormid bree as jeeyl çhymbyllagh.[11]
Cynara cardunculus - Thie Tashtee Toulouse
Duillagyn aegey
Buinney blaaghey
Lossreeyn
Buinney
Çheet my vlaa
Troaragyn ayns Ágreda, y Spaainey
Cardoon coagyrit 'syn aght Nafarroagh
Cardoon 'sy tourey ayns Garey Lus-Oaylleeagh München.
She lus 'sy chynney Asteraceae eh cardoon (Cynara cardunculus). She mooinjer dooghyssagh onnane vlasstal t'ayn, as shimmey troarag t'echey. T'eh dooghyssagh da'n Oarpey heear as Meanvooiragh.
