Die Wåldréb isch in sidóstdeitschn Raum unter verschiedne Pezeichnungen pekånnt: Herrgóttspårt, Lüln, Liasch, Lian, Lierach, Ialréb, Ulischwidn, Weißrébe. A påår va dé Werter kémmen (gleich wia as schweizrische „Niele“) ausn ålthoachdeitschn liola, dés isch a Pezeichung fir oane óder mehrere Årtn va Kletterpflånzn. Ålthoachdeitsch liolīn pedaitet „rankenartig“.
Draus isch versténtlich, dass sie a Kletterpflånz isch. Wénn sie Hålt fintet, klettert sie pis iber 20 Meter af die Pam aufi, schusch kråbblt sie afn Pódn manånt. As Stamml wert pis zu a påår Zéntimeter dick. Sie håt drei- pis finffåch gfiederte Plattlen, der Stingl van Lab isch pógn und schlingg sich um die Zweig va åndre Pflånzn. Die Pluah håm 4 weißliche Krónplattlen unt 2 cm Durchmésser. In der kåltn Jåhreszeit fålln die puschign, kuglign, silbrign Fruchtstént auf.
Man fintet die Ialréb in liachte Walder, Héckn, Auwalder, pa die Wåldtrénder. Sie zoagg Stickstóff in Pódn ån unt isch giftig. Pehoamatet isch’i va Éurópa pis zu Kaukasus, pis af iber 1000 m Heach, åber nét in Nórdn.
Es gip åndre Årtn va Wåltrébm, dé als Ziĕrpflånzn ghåltn wern.
