Boletus chrysenteron, o boletu de carne mariello,[1] ye un fungu basidiomiceto de la familia Boletaceae, que puede atopase tantu en montes de frondosas como de coníferes, en diversos tipos de suelos. El cuerpu granible apruz de branu a seronda y ye abondo frecuente. Ye un fungu comestible, de sabor y golor prestosu, pero pocu apreciáu por cuenta de la testura de la so carne, que ye demasiáu esponxosa. L'epítetu específicu "chrysenteron" significa, en llatín, "con carne dorao".[1]
El cuerpu granible del B. chrysenteron tien un sombreru d'ente 3 y 12 centímetros de diámetru, hemisféricu o convexu, que toma una forma más esplanada ya irregular nos exemplares menos nuevos. La cutícula ye seca y mate, aterciopelada nos exemplares xuveniles, y de color pardu o pardu verdosu, que se seda con muncha facilidá. La carne que ta baxu xusto la cutícula tien un color acoloratáu que ye bien característicu. Los tubos de los exemplares nuevos son mariellu maciu y van tomando un tonu mariellu verdosu al maurecer la cogorda, que se vuelve azul al tactu. Los poros son grandes y poligonales, del mesmu color que los tubos o de color doráu. El pie tien unes dimensiones que bazcuyen ente 3 y 10 centímetros de llargu, y ente 0,5 y 2 centímetros d'anchu, ye espodáu y dacuando puede ser bien llargu y tropezosu. La so carne ye mariella y esponxosa, blanda, y toma color coloráu na zona que ta so la cutícula, y toma tonos azules y acolorataos cuando se corta. La esporada ye de color marrón olivácea.[1]
Ye posible confundilo con Boletus subtomentosus o con Boletus ferrugineus, que, amás de presentar un aspeutu asemeyáu, tampoco son tóxiques.[1]
Boletus chrysenteron, o boletu de carne mariello, ye un fungu basidiomiceto de la familia Boletaceae, que puede atopase tantu en montes de frondosas como de coníferes, en diversos tipos de suelos. El cuerpu granible apruz de branu a seronda y ye abondo frecuente. Ye un fungu comestible, de sabor y golor prestosu, pero pocu apreciáu por cuenta de la testura de la so carne, que ye demasiáu esponxosa. L'epítetu específicu "chrysenteron" significa, en llatín, "con carne dorao".
