El gatu doráu africanu (Caracal aurata) ye una especie de mamíferu carnívoru de la familia Felidae de tamañu mediu que vive nos montes lluviosos d'África central y occidental, dende Guinea Bissau a les rexones fronterices de Queña y Tanzania ya incluyendo tola rexón del Congo.
Los exemplares adultos presenten tamaños bien variables, ente los 61 y 101,5 cm de llargu, con una cola de 16 a 46 cm y una altor sobro los costazos de 38 a 55 cm. Los machos son más robustos que les femes, con un pesu de 11 a 18 kg frente a los 5,5-6,2 qu'algamen estes. El so aspeutu xeneral pue describise como similar al d'un gatu domésticu pero daqué más poderosu y allargáu, cola cola curtia y oreyes pequeñes. A pesar del so nome, el color de la pelame tamién ye bien variable, con una gama de tonos que van dende l'acoloratáu al amarellentáu o inclusive'l gris fumu. Anque la mayor parte del cuerpu presenta una pelame uniforme, puen reparase llurdios de tonalidá, tamañu y formes variables nel banduyu y, nel casu d'una de les subespecies, la cabeza. Estos llurdios nunca son de color negru, sinón simples tonalidaes daqué más escures de el so color xeneral. Los animales calteníos en cautividá algamen los 15 años de vida. [1]
Dientro de la selva lluviosa, l'hábitat de los gatos doraos africanos ye tan variable como'l so aspeutu, lo qu'esplica la so amplia distribución. Pue atopáse-yos tantu en tierres baxes como en montes, nes riberes de los ríos y los montes de bambúes, anque en tolos casos precisen d'una bona cobertoria arbórea.
La caza nun se basa tantu nel acesmo como nos ataques casuales, tanto sobro y dende los árboles como nel suelu. Ente les sos preses inclúyense pequeños antílopes (duikers), monos, royedores, damanes y aves. Los vezos de apareamiento nun se conocen en fondura por cuenta de la dificultá pa estudiar esta especie nel so mediu.
El gatu doráu africanu (Caracal aurata) ye una especie de mamíferu carnívoru de la familia Felidae de tamañu mediu que vive nos montes lluviosos d'África central y occidental, dende Guinea Bissau a les rexones fronterices de Queña y Tanzania ya incluyendo tola rexón del Congo.
