A chinche (d'o latín <CIMEX, -ICIS; Cimex lectularius L., 1758) ye un insecto hemiptero de a familia Cimicidae.
Se conoix especialment por estar una especie hematofaga, parasita externa d'os sers humans y d'atros vertebraus homeotermos, que a sobén habita en a ropa, especialment a d'os leitos, y en as alfombras, sofás y atros muebles, que fa servir ta cubillo dende a on que amaneix de nueitz ta fizar a las suyas presas.
A chinche ye un insecto muit chiquinín, de nomás bells milimetros de largo, que no vive de perén sobre o huespet, sino que acude t'a on que iste ye y le fiza, retirando-se dimpués ta tornar a amagar-se. Ye capable ta pasar-se semanas u dica meses sin tornar a incherir gota más de sangre, sumindo-se en un estau de letarchia.
En a forma adulta no tiene alas. Como totz os hemipteros, tiene metamorfosi incompleta u hemimetabola, o que quiere dicir que no tiene larvas, sino que os chiquinins naixen ya d'o uevo con forma semellant a la de l'adulto, o que se conoix cono nimfa.