عضاض شائع

La Sama (Dentex dentex) , (en dalgunos llaos, tamién denomáu dentón) ye una especie de pexe de la familia de los espáridos, común nel Mar Mediterraneu.

Morfoloxía

Los adultos pueden algamar hasta 100 cm de llargor, con un pesu máximu d'unos 14 kg.^[2]

Tien una piel color gris verdosu nos xuveniles y gris acoloratáu n'adultos, con pintes azulaes brilloses y dacuando unes rayes escuru a tresversal. Tien una llarga y única aleta dorsal con radios espinosos que puede plegar nun riegu escondiéndola. Pa capturar les sos preses tien cuatro fuertes caniles nun dentame ensin molares -anque nun resulta peligrosu pa los humanos-.

Hábitat y bioloxía

Espárdese pel Atlánticu este, dende les islles Britániques a Mauritania, escepcionalmente hasta Senegal, Canaries y Madeira, y per tol Mediterraneu, onde ye relativamente común nes mariñes d'España y norte d'África.^[3] El so hábitat ye bentopeláxicu, ente 0 y 200 m de profundidá pero preferentemente a menos de 50 m, escondíu sobre fondu predresu o de sable.^[4] Los xuveniles son gregarios y viven en bálamos cercanos a la oriella, pero los adultos son solitarios y suelen tar a más fondura.^[5]

Ye un voraz depredador que caza a la chisba, permaneciendo escondíu a la espera de que pase una presa. Aliméntase principalmente de pexes, cámbaros y moluscos, siendo la so comida preferida'l calamar.

Tocantes a la reproducción dellos individuos nuevos son hermafrodites, pero al crecer tienen sexos separaos. L'apareamientu con fecundación esterna tien llugar cerca de la oriella, eclosionando los canesbes a los trés díes de la puesta.^[6]

Pesca y gastronomía

Ensayóse con bastante ésitu'l so cultivu en acuicultura, con un bon potencial pal futuru.^[4]

Davezu consúmese na gastronomía española, fácil d'atopar nos mercaos.

Referencies

1. ↑ Carpenter, K.E. y Russell, B. (2014). «Dentex dentex» (inglés). Llista Roxa d'especies amenazaes de la UICN 2015.2.. Consultáu'l 08 septiembre 2015.
2. ↑ IGFA, 2001 Database of IGFA angling records until 2001.
3. ↑ Bauchot, M.L. y J.C. Hureau, (1986) Sparidae. p. 883-907.
4. ↑ ^{4,0 4,1} Frimodt, C., 1995 Multilingual illustrated guide to the world's commercial warmwater fish.
5. ↑ Efthimiou, S., 1996 Performance of juvenile and ongrowing common dentex (Dentex dentex), L. 1758, Sparidae) in relation to nutrition under culture.
6. ↑ Bertolini, F., U. D'Ancona, E. Padoa Montalenti, S. Ranzi, L. Sanzo, A. Sparta, E. Tortonese y M. Vialli, (1956) "Uova, larve e stadi giovanili di Teleostei".

Enllaces esternos

Bibliografía

• El léxico de la fauna marina en los puertos pesqueros de Asturias Central, Emilio Barriuso, Uviéu 1986. IDEA.