L' aleta blanca (Ficedula hypoleuca), tamién clamata chapeta, ye un paseriforme chicotón d'a familia d'os muscicapidos u cazamoscas. Habita per un regular en buena parte d'Europa y de l'Asia occidental, pero ye un au migratoria que acostumbra a pasar los hibiernos en Africa.
La suya largaria ye d'entre 12 e 13,5 centimetros. Lo masclo reprodutor ye reconoixible per lo suyo plumache negro per dalto, con malla blanca en a frent, y blanco per debaixo, con randeta blanca tamién en l'ala. Lo plumache d'a fembra ye más d'un pardo claro. Ta d'agüerro, encambio, los dos sexos comparten la mesma color pardisca, lo que fa difícil diferenciar-los d'altros cazamoscas d'o mesmo chenero. Ista diferiencia sexual fa que se distinga de l'aleta parda.
Lo bieco u pipón ye negro. Amás d'os insectos cazatos de revolata (mosquitos, palometas...), ista especie s'alimenta tamién de lulos y d'as tenyas que atrapa en as fuellas d'os caixicos. Ye sobretot en os caixicars an puede sentir-se lo melodioso canto suyo ta de primavera, anque puede trobar-se en altras arboleras y selvas caducifolias, an aproveitan los foratos d'os árbols ta fer niedo.
