De Buckkävers (Cerambycidae) sünd en grote Familie mank de Kävers (Coleoptera). Dor höört unbannig veel Aarden to. Utmaken kann een de dör de sunnerlich langen Föhlspriete mit allerhand Le’e. De sünd faken langer, as dat ganze Lief. Vunwegen, datt se na achtern bagen sünd, laat se na de Hörner vun en Steenbuck. Up de ganze Welt gifft dat bi 26.000 Aarden, dor bi 200 vun in Europa. Ok de gröttste Käver, de bit up düssen Dag bekannt is, höört mit siene 17 cm Längde (Lief sunner Föhlspriete) in düsse Gruppen. Dat is de Kaventsmann-Buckkäver (Titanus giganteus) ut Brasilien. In Middeleuropa is de gröttste Aart mit bi 6 cm Längde over’t Lief de Mulmbuck (Ergates faber).
Buckkävers sünd faken glimmerbunt in allerhand Farven.
Dat Lief is bi düsse Käverefamilie meist langs tagen. Heken sünd faken grötter, as Seken, man towielen is dat ok annersrum. Eendüdig uttomaken sünd de Buckkävers an ehre langen Föhlspriete, de ehre Längde meist mehr as twee Drüddels vun dat Lief utmaken deit, man de faken ok langer sünd, as dat Lief. Bi dat Heken vun den Timmermannsbuck (Acanthocinus aedilis) sünd de Föhlspriete mit bi 10 cm bi fiev mol so lang, as dat Lief, wat man bloß 2 cm lang is. De Föhlspriete könnt na vörn un ok na de Sieten hen utreckt weern. Bloß in Sammlungen vun Insekten weert se ut Platzgrünnen jummers na achtern leggt.
De bannig langen nun dannigen Föhlspriete mütt an den Kopp vun de Kävers good fastmaakt weern, un to’n Hen- un Herrögen weert allerhand Muskeln bruukt. So blifft an de Kävers ehren Kopp nich mehr so veel Platz för de Ogen. Vundeswegen wasst bi allerhand Aarden vun Buckkävers de Ogen vun achtern um den Grund vun de Föhlspriete umto. Bi allerehand Aarden vun Buckkävers sitt Doorns an dat Halsschild an.
Wenn de Buckkävers utwussen sünd, freet se Pollen, Blötendeele oder Boomssapp, dat hangt vun de Aart af. Man meist freet se keen Fleesch, man bloß Plantendeele. Dat gifft ok Gruppen, as de Weverbücke oder Grasbücke, de freet as adulte Deerter gor nix mehr. As Rövers leevt de amerikaanschen Elytroleptus-Aarden. Se jaagt un vertehrt Rooddekenkävers (Lycidae), de ehren Smaak de meisten Rövers nich möögt. Wohrschienlich weert se vundeswegen sülms ok nich freten.
De meisten Buckkävers könnt good flegen. Allerhand Aarden könnt Luud geven, wenn se mit de Vörbost (Prothorax) gegen de Middelbost (Mesothorax) nicken doot. Dat maakt se sunnerlich, wenn se stöört weert. Wohrschienlich verjaagt se so möögliche Feende.
Vergleken mit de Tied as Budde leevt de adulten Kävers man kort, sunnerlich, wenn een de Tied aftrecken deit, wo de Deerter overwintert un nich aktiv sünd. De meisten Deerter leevt aktiv man bloß 90 Dage, allerhand Aarden ok bloß 30 Dage oder noch minner.
. Mehr Biller, Videos oder Audiodateien to’t Thema gifft dat bi Wikimedia Commons. De Buckkävers (Cerambycidae) sünd en grote Familie mank de Kävers (Coleoptera). Dor höört unbannig veel Aarden to. Utmaken kann een de dör de sunnerlich langen Föhlspriete mit allerhand Le’e. De sünd faken langer, as dat ganze Lief. Vunwegen, datt se na achtern bagen sünd, laat se na de Hörner vun en Steenbuck. Up de ganze Welt gifft dat bi 26.000 Aarden, dor bi 200 vun in Europa. Ok de gröttste Käver, de bit up düssen Dag bekannt is, höört mit siene 17 cm Längde (Lief sunner Föhlspriete) in düsse Gruppen. Dat is de Kaventsmann-Buckkäver (Titanus giganteus) ut Brasilien. In Middeleuropa is de gröttste Aart mit bi 6 cm Längde over’t Lief de Mulmbuck (Ergates faber).
