Sovaja oxalo (Oxalis acetosella) esas basa e tenua planto qua vivas maxim bone en tenebrala piceo-foresto. Nur filiko prosperas kun sovaja oxalo en ca tenebreso. La planto quik perisas se la suno ulakauze atingus lua kreskoloko.
Sovaja oxalo havas tri kordio-forma folii en fino di la stipito. La folii esas tre dina.
Sovaja oxalo havas komparante a lua folii granda flori, qui ofte kreskas en grupi. La basala koloro esas blanko kun violea strii, ma anke preske tote violea flori existas. Sovaja oxalo florifas frue en printempo uzante energio rezervita en lua subsulala stipito ma la florifo duras longe en somero. La somerala flori ne desfaldesas e la planto produktas grani sen insekti. En lua folikulo esas c. 15 grani, qui jetas su mem a disto di 2 metri. L'adheriva grani iras fore anke en furo di animali.
Dum la vespero la flori turnas su advale, kande li komencus dormar. Fakte la planto tale diminutas transpiranta areo. Anke la folii esas sensitiva a tusho.
La folii uzesas en salado vice citrono. La saporo di la folii esas acerba e semblas la saporo di rubarbo ed oxalo. La folii kontenas oxalika acido qua supresas mem la apetito di limaki. La folii kontenas anke C-vitamino, kalio e kalcio. En populala kuracado sovaja oxalo uzabis kontre febro e skorbuto. On anke pensis, ke ol detersus sango.
Segun la nuna savo, l'uzo di sovaja oxalo ne esas rekomendata. En granda quanto l'oxalika acido domajas la reni. Ma kom senmakuligilo ol esas ankore uzebla.
