El spanavin (dito anca spandavin, panevin o panavin) (nome sientifico Rumex acetosa) el xe na erba ke vive tuto l'ano, deła fameja dełe Polygonaceae. Ła se ciama in inglese sorrel, in todesco Wiesensauerampfer, in tałjàn acetosa o erba brusca. Sta pianta ła ga na grosa raixa e un pecol tuto drito alto 1 metro. Łe foje deła baxe łe xe a forma de punta de lancia, quełe tacà al pecol łe xe tute rodołà intorno. I fioreti, rosi, i xe ingrumà a faseti su par na longa panocia.
El spanavin el ga drento osałati (nol va ben par quei ke ga i calcołi renałi), antrakinoni, vitamina C e fero. El se magna cruo, in sałata, coto come i radici, drento łe fortaje, o el se dopara par far supe de erbe.
