Sipuncula

Sipúnculos

Sipuncula

Clasificación científica Reino: Animalia Subreino: Eumetazoa Superfilo: Lophotrochozoa Filo: Sipuncula Clases, Ordes e Familias

• Clase Phascolosomatidea
  • Orde Aspidosiphoniformes
    • Familia Aspidosiphonidae
  • Orde Phascolosomatiformes
    • Familia Phascolosomatidae
• Clase Sipunculidea
  • Orde Golfingiiformes
    • Familia Golfingiidae
    • Familia Phascolionidae
    • Familia Themistidae
  • Orde Sipunculiformes
    • Familia Sipunculidae

Os Sipúnculos (Sipuncula ou pequeno tubo) son un grupo de animais mariños que presentan simetría bilateral, son protóstomos, celomados non segmentados e sedentarios. Posúen unha forma alongada na que se diferencian dúas partes: a trompa e o tronco.

Adoitan vivir enterrados na area ou na lama, ou ben ocupan calquera espazo no que colla o seu corpo como unha fendedura dunha rocha, un tubo ou unha cuncha doutro animal.

Estes animais, aínda que non son moi abundantes, están moi estendidos: dende mares cálidos a polares, dende zonas superficiais a abisais, e actualmente coñécense unhas 320 especies ^[1]. O seu tamaño oscila entre os 2 mm e os 50 cm.

Características

As principais características deste Filo son as seguintes:

1. Son animais protóstomos, celomados, pero sen segmentación e con simetría bilateral.
2. O corpo presenta dúas partes: a trompa ou introverto, na que está a boca e o tronco que e máis longo e groso e no que están a maioría dos órganos internos.
3. Dous nefridios de tipo mixonefridio, con nefrostoma e nefridióporo. Son animais amoniotélicos xa que expulsan a maior parte dos residuos en forma de amoníaco.
4. Posúen un sistema nervioso semellante ao dos anélidos, con un cerebro dorsal e un anel nervioso periesofaxico, e un cordón nervioso ventral.
5. Os órganos dos sentidos son múltiples e variados: teñen células neurosensoriais nos tentáculos, un órgano nucal quimiorreceptor, zonas ciliadas e ocelos tubulares.
6. Os sexos están separados (macho, femia), e as gónadas son simples e proveñen do peritoneo os gametos son expulsados polos nefridios. A fecundación é externa.
7. A segmentación é espiral formándose unha larva trocófora e o celoma é esquizocélico.

Notas

1. ↑ "Chapman, A.D. 2007. Numbers of Living Species in Australia and the World. Invertebrates. A Report for the Department of the Environment and Heritage. Australian Biodiversity Information Services, Toowoomba, Australia. ISBN (online) 978 0 642 56850 2". Arquivado dende o orixinal o 28 de maio de 2009. Consultado o 17 de decembro de 2009.

Bibliografía

• Meglitsch, P.A Zoología de invertebrados, 2ª edición. Ed.Pirámide, Madrid 1986 pp 471–475 ISBN 84-368-0316-7

Véxase tamén

Outros artigos