Сойка або тыж кукша (Garrulus glandarius) є птах великости голуба з родины вороновых, росшыреный в цїлій Европі, Азії і в северозападній Африцї.
Сойка є нафаребнїшый европскый представитель своёй родины. Є помаранчовобура з чорным хвостом і дзёбаком, ружовопомаранчовыма ногами, бурыма очами і білов гудзіцёв, котра є особливо нападна почас лїтаня. На крылах мать синї пірка з чорныма перечныма смужками, під оком чорный поздовжный фляк. Лїтать тяжко, вовнково і трепаво, на земли підскакує. Поглавя мають тоты самы фарбы, молоды птахы суть тмавшы і мають менше выразны синї пірка на крылах.
Сойка ся цїлорочно находить в змішаных лїсах, листяных і шпильковых лїсах, парках, загородах, садах і в остатнїм часї рїдкіше і в містах. Страчать свою природну полошавость і навщівлять містьскы паркы і загороды.
Обычайно ся озывать храптивым „кшрее“, мнявкавым „пієее“, котре є про лаіка нерознательне од кликаня канї лїсовой або гыбкым „куіт“.
Страву глядать як на стромах так і на земли. Жывить ся передовшыткым рослиновов стравов, окремо пак жолудями і буквіцями, котры собі скрывать в скрыші на зиму, але тыж і лїсковыма орїхами, зерном, різныма плодами і насїнём, чорніцями ці ярабинов ітд. Мясову страву творять передовшыткым молоды птахы, мышы, слимакы, ящуркы ці малы гады. Сама ся ставать частов жертвов векшых хищів.
Гнїздить од кінце мая до початку юна. В припадї страчіня першой зношкы гнїздить звычайно бігом юна іщі раз. Гнїздо з конариків і постелене мохом або травов собі будує на конарях стромів або высокых кряках обычайно 5 м над землёв. В єднотливых інтервалах кладе саміця 5-7 жовтосивых 40×33 мм великых яєць; друга зношка парів, котры пришли о першу, мать 3-4 яйця. Інкубачна доба тырвать згруба 16–17 днїв.
На кормлїню молодять беруть участь обоми родічі. Молодята опущають гнїздо дас в 21–22 днях жывота, але іщі по добу 3 тыжднїв суть своїма родічамы прикормлёваны. В природї ся може сойка дожыти і веце як 15 років.
Розознаваме приближно 42 підвидів сойкы, в середнїй Европі жыє підвид сойка середоевропска (G. g. glandarius).
Сойка або тыж кукша (Garrulus glandarius) є птах великости голуба з родины вороновых, росшыреный в цїлій Европі, Азії і в северозападній Африцї.
