Pinguïns zien middelgroete tot groete neet-vleugende veugel oet de orde Sphenisciformes en de femilie Spheniscidae. Ze leve allemaol op 't Zuielek Haafroond en veural in kösgebeje; de mieste soorte bringe e good deil vaan hun leve in 't water door. Mèt hun klein mer krachtege vleugele kinne ze neet vlege, meh dees lidmaote zien speciaal oontwikkeld veur oonder water te zwumme. Hun dieet besteit bekans compleet oet vès en aander ziebieste. Allewel tot ze gemeinelek mèt Antarctica weure geassocieerd, koume sommege soorte zjus in de trope veur.
Pinguïns leve in gróppe vaan tientalle tot hoonderde of zelfs doezende exemplare, aofhenkelek vaan soort. Dèks breujt 't menneke 't ei oet of nump temeenste e deil vaan de verzörging vaan 't kuke op ziech.
