O ciquilín u xoriguer (Falco tinnunculus (L., 1758)) ye una especie de falcón de mida chiqueta muit freqüent en Europa, Meyo Orient y o norte d'Africa. Se considera a especie de falcón más chiqueta que reside de perén en ixes países, pos a sola especie que i gosa competir de mida tan chiqueta ye o esmerellón (Falco columbarius), que ye un au migradera.
O ciquilín ye una Falconiforme chiqueta, d'entre 34 y 38 centimetros de lonchitut y d'entre 70 y 80 cm d'envergadura d'alas. As alas son soras u royiscas, color d'archila cueta en a esquena d'os masclos, más discretas en as fembras. A cabeza d'os masclos adultos ye, de manera caracteristica, de color grisa. Totz, masclos y fembras, tienen a punta d'a coda y d'as alas negra, y una faixeta fusca que les baixa por a galta debaixo d'os uellos. Como en totz os miembros d'o chenero Falco, a cera d'o pico, os parpiellos y as patas son de color amariella viva.
Os ciquilins son animals muit adaptables, que habitan bien en zonas con buena presencia humana. S'han gosato documentar buena cosa d'exemplars en zonas urbanas y dica adintro d'as grans ciudatz. Meten as cobatas en os edificios, en as falsas y debaixo d'os tellatos. Cazan millor en espacios opiertos que no en as selvas, y tienen per caracteristica que a sobén no s'albiran o terreno dende bell puesto elevato como fan altras aus de presa, aguardando-ie que pase bella victima d'antes de volar-se contra ella, sino que baten as alas y se mantienen quietos en un punto en l'aire, tot cernindo-se.
Se conoix con o zoonimo «ciquilín» en buena parte d'o territorio de parla aragonesa,[1] documentando-se de manera indistincta en comarcas diferents como l'Alto Galligo, a Chacetania, o Sobrarbe, os Monegros, as Cinco Villas. Puntualment se documenta con ch- inicial, «chiquilín», talment per mesclar-se o termino con l'adchectivo «chico» que tan bien s'escai a la suya descripción per a mida tan chiqueta que tiene.
En a Ribagorza a parola ta decir-ne ye más variadera. En bells municipios se i reconoix o termino aragonés «ciquilín», sobretot en a zona occidental d'a comarca, en nuclios como Foradada d'o Toscar,[1] La Poblla de Fantova[1] y Esdolomada.[1] En a zona más oriental, anque a parla local faiga parte de l'idioma aragonés, i utilizan parolas que pareix que hipoteticament se relacionarían con a radiz etimolochica de «zorz»: Se rechistra «choriguer»[1] en Benás y en A Puebla de Castro, «ixoriguer» en Benás,[1] en Castillón de Sos[1] y en Sarller.[1]
En Echo y en Ansó, en l'altro estremo d'os Pireneus d'Aragón, se i ha puesto trobar tamién a forma «xoriguer»,[1] y per isto cal descartar que se tracte d'un orientalismo. Anque en qualsiquier caso, pareix que se tracta d'un termino más minoritario.
Paralelament a tot isto, en bellas localidatz tamién se documentan formas d'o nombre relacionatas con a forma «esparver», que en aragonés sole fer referencia a especies de mida más gran. Se rechistra como «esparvel» en as Cinco Villas,[2] en Pina d'Ebro[1] y en Echo.[1] Como «esparvero» en Sarller,[1] en Granyén,[1] en Benás[1] y en Alcanyiz;[1] «esparver» en Benás,[1] en Sarller,[1] en Chía,[1] en Vallabriga[1] y en Esdolomada[1] y «esparveret» en As Cortz[1] y en Campo.[1] Como se puede veyer, a destribución cheografica d'ixas formas ye aleatoria, y millor se gosan interpretar como errors d'identificación u eixemplos d'uso d'un termno impreciso que no como formas de nombre propio ta ista especie.
Pollet de poquetz días en un tiesto.
O ciquilín u xoriguer (Falco tinnunculus (L., 1758)) ye una especie de falcón de mida chiqueta muit freqüent en Europa, Meyo Orient y o norte d'Africa. Se considera a especie de falcón más chiqueta que reside de perén en ixes países, pos a sola especie que i gosa competir de mida tan chiqueta ye o esmerellón (Falco columbarius), que ye un au migradera.
O ciquilín ye una Falconiforme chiqueta, d'entre 34 y 38 centimetros de lonchitut y d'entre 70 y 80 cm d'envergadura d'alas. As alas son soras u royiscas, color d'archila cueta en a esquena d'os masclos, más discretas en as fembras. A cabeza d'os masclos adultos ye, de manera caracteristica, de color grisa. Totz, masclos y fembras, tienen a punta d'a coda y d'as alas negra, y una faixeta fusca que les baixa por a galta debaixo d'os uellos. Como en totz os miembros d'o chenero Falco, a cera d'o pico, os parpiellos y as patas son de color amariella viva.
Os ciquilins son animals muit adaptables, que habitan bien en zonas con buena presencia humana. S'han gosato documentar buena cosa d'exemplars en zonas urbanas y dica adintro d'as grans ciudatz. Meten as cobatas en os edificios, en as falsas y debaixo d'os tellatos. Cazan millor en espacios opiertos que no en as selvas, y tienen per caracteristica que a sobén no s'albiran o terreno dende bell puesto elevato como fan altras aus de presa, aguardando-ie que pase bella victima d'antes de volar-se contra ella, sino que baten as alas y se mantienen quietos en un punto en l'aire, tot cernindo-se.