Mjetelowy bóz (Buddleja davidii; po němskim słowje Schmetterlingsflieder) je rostlina ze swójby trudownikowych rostlinow (Scrophulariaceae), znutřka roda lětnich bozow (Buddelja).
Mjetelowy bóz je kerk, kotryž docpěwa wysokosć wot 1 hač do 2 (4) m. W zymnych zymach drjewa často daloko wróćo mjerznje, zaso so pak počina zelenić.
Hałuzy su zrunane. Młode wurostki su kosmate a prućojte, pozdźišo tróšku jako wobłuk přewisuja.
Přećiwostejne, stołpikate, eliptiske hač lancetojte, wótre łopjena su na hornim boku ćmowozelene, na delnim boku šěropjelsćojte abo běłopjelsćojte a maja słabje rězanu kromu. Wone docpěwaja dołhosć wot (6) 10 hač do 25 cm a šěrokosć wot 2 hač do 7 cm.
Kćěje wot julija hač do awgusta (abo septembra). Wioletne, purpurowe abo běłe, štyriličbne kćenja docpěwaja dołhosć wot něhdźe 1 cm a steja w hustych, nakónčnych, wjace hač 30 cm dołhich, cylindriskich pakićach. Wonja po mjedźe. Króna je ćeńka rołka ze štyrikónčkowej, płonje rozšěrjenej wobkromu a docpěwa dołhosć wot 1 cm. Jeje kónčki su rozšěrjene a na zachodźe sylnje žołte.
Na nektar bohate kćenja předewšěm mjetele přiwabjeja.
Płody su brunojte kapsle, kotrež w septembrje dozrawja. Jedyn kerk móže na lěće wjacore miliony symjenjow wutwori.
Rosće na pustych płoninach w městach, na železniskich nasypach, na kromach dróhow a na rěčnym šotrje. Potrjebuje za kołochowanje wotewrjene pódy.
Pochadźa z Chinskeje a z Japanskeje. Ale nětko nimale jenož w mnoholičbnych zahrodnych sortach w Europje wustupuje.
Mjetelowy bóz (Buddleja davidii; po němskim słowje Schmetterlingsflieder) je rostlina ze swójby trudownikowych rostlinow (Scrophulariaceae), znutřka roda lětnich bozow (Buddelja).
