Hypericum hircinum L.

L' Erba bicchina (o Arba bicchina) (Hypericum hircinum) hè un tipu di pianta chì face parte di a famiglia di l'Hypericaceae.

Discrizzione

Hè uriginaria d'Africa, d'Europa è d'Asia. L'erba bicchina stà in i lochi freschi è umbrosi. I fiori sò gialli. Fiurisce da maghju à aostu.

In Corsica

L' erba bicchina hè cumuna in Corsica. U nome corsu vene da u fattu chì 'ssa pianta hà un odore chì s'assumiglia à quellu di u beccu. Hè ancu chjamata a bicchinella, u fiori sanghjuvanninu, l'erba sanghjuvannina o u pericu.

Usi

Medicinali

In Corsica, si ni fecia una tisana in i tempi per luttà contru à à pena di corpu.^[1]

Ci conta dinù Arnestu Papi ch'in San' Ghjuvanni era per appuntu u mumentu di coglie l'erbe salutifere:

« U ghjornu o a vighjilia di San Ghjuvanni hè u mumentu santu par codda l’arbi è l’arbetti chì curani i malatii o chì pruteghjani da i malanni. Uni beddi pochi hani virtù straurdinarii. I chjamani « arbi di San Ghjuvanni ». I più cunnisciuti sò l’arba di San Ghjuvanni, « l’arba santa », « a matricaria », o « a matrunella », o « a camumiglia », « a calendula » o « baraculi », « a salvia », « l’eddara », « l’erba di taglia », o « l’artimisia (...).^[2] »

Note

1. ↑ Simonpoli (1982), p. 31.
2. ↑ http://ernestpapi.free.fr/Mesi,%20santi.%20Mois,%20saints.htm Mesi è santi].

Bibliugrafia

• Conrad, Marcella, I corsi è e piante salvatiche innanzi è avà, 1981, Adecec
• Gamisans, J. & Jeanmonod, J. (1993) Catalogu di i pianti vascularii di Corsica - Catalogue des plantes vasculaires de la Corse, Cunservatoriu è giardinu botanicu di a cità di Geneva: Geneva (in francese)
• Paulu Simonpoli, E piante salvatiche - Cunniscenze è usi, 1982, Parcu Naturale di Corsica

Da vede dinù

• i fiori di Corsica