Tussilago farfara l'è 'na spéce de piànta erbàcea che fà part de la famìa botànica de le Asteraceae. L'è l'ünica spéce del zèner Tussilago. L'è 'na spéce uriginària de l'Eurasia, ma l'è deentàda familiàr apò a 'ndel'Amèrica Setentriunàla e Meridiunàla 'ndóche l'è stàda portàda de l'òm per la sò 'mportànsa come piànta medicamentùza.
Fùrma Biològica: G rhiz - Geòfite rizomatùze. Piànte che g'ha 'n gamp töt particolàr che rèsta sóta tèra (ciamàt rizòma), che töcc i agn el trà fò raìs e gamp che düra apéna chèl che sèrf.
L'è 'na piànta erbàcea perène, che de spès la fùrma dei bèi squacc, àlta dei 8 ai 30 ghèi.
La g'ha 'n rizòma urizontàl, quàze biànch e che se spàca facilmènt. De chèsto rizòma part i gambì che pórta i fiùr, pò a lur ciàr ciàr quàze biànch, sènsa ramificasiù, con tàte fuiulìne tacàde al gambì, ormài rüdìde a schìde de culùr 'ntra 'l vért e 'l rós. En sìma al gambì se fùrma 'l fiùr. L'è furmàt de 'n invòlucro cilìndrich e de 'n capulì de culùr zalt bèl vif, de 2÷3 ghèi. El capulì l'è furmàt de fiùr mascc e tubulùs en mès e de fiùr fèmina ligulàcc töt entùren. El fiùr el se sàra de nòt. El fiorés de febrér a bril. El pöl crèser de la pianüra 'nfìna al leèl subalpì, 'nfìna ai 2400 méter.
Tussilago farfara l'è stàda discriìda del Linèo e püblicàda 'ndèl Species Plantarum 2: 865. 1753.[1]
Enfiurescènsa a capulì
Fòie
Rusilì de fiùr
Tussilago farfara l'è 'na spéce de piànta erbàcea che fà part de la famìa botànica de le Asteraceae. L'è l'ünica spéce del zèner Tussilago. L'è 'na spéce uriginària de l'Eurasia, ma l'è deentàda familiàr apò a 'ndel'Amèrica Setentriunàla e Meridiunàla 'ndóche l'è stàda portàda de l'òm per la sò 'mportànsa come piànta medicamentùza.
