Prickly Juniper

O Juniperus oxycedrus ye una especie de chinebro propia d'o clima mediterranio.

Caracteristicas

Ye un arbusto con fuella perén, que puet abastar os 10 m d'altaria y tien una copa muito densa con corma conica u ovalata, rematando a sobén en punta. Tronco grueso y dreito con crosta fibrosa, pardo grisenca, con fuellas verticilatas por tres, aciculars, tiercas, punchents, con dos linias blancas en la parte superior, separatas por atra de verdenca més estreita. Ye una especie dioica, produce pietz masclos y pietz fembra.

A florata ye a fins d'hibierno y mientres a primavera, maturando as arcestidas (lo que pareixen fruitos), a la segunda anyata, los fruitos son globosos u ovoides, carnosos, pareixitos a bayas, con una color verdenca a lo principio, dimpués royo u pardo-royenco.

Subespecies

Ye una planta muito variable y bi ha bellas subespecies que se distinguen por a color d'as arcestidas, largaria d'as fuellas, etz.; Entre as suyas subespecies tenemos a:

• Juniperus oxycedrus L.subsp macrocarpa que vive en os arenals y dunas d'as costas. Tamién dito chinebro maritimo.

Habitat

Creixe en tot tipo de suelos y selvas, principalment en carrascals y atras selvas mediterranias, mantenendo-se quan los tallan y soportando muito bien os suelos pedregosos y poco profundos; dende o ran d'o mar dica os 1000 m, on empecipian a estar escasos. Aguanta os climas secos.

Juniperus oxycedrus subsp. macrocarpa

Usos

A fusta ye aromatica, de color royenca, gran fin, muito resistent a la putrefacción, facil de treballar, s'ha feito servir en ebanistería, y da buenos pilars y vigas. Se cautiva como ornamental y pa formar setos.

Enantes se'n obteneba una resina medicinal clamata cresota en o Semontano de Balbastro y un aceite medicinal clamato miera.