Cicadomorpha

De Singzikaden (Cicadomorpha), ok Rundkoppzikaden nömmt, sünd en Twuschenornen (Infraordo) mank de Insekten. Se höört to de Unnerornen vun de Zikaden (Auchenorrhyncha) mit to, un ok to de Ornen vun de Snavelinsekten (Hemiptera). Vun de Singzikaden gifft dat mehr, as 33.000 Aarden in mehr as 5.000 Geslechter un 11 Familien.

Wie se leven doot

Just so, as de Lantüchtendregers leevt de Singzikaden an Land. Se könnt flegen, lopen un meist ok good jumpen. En ganzen Barg Zikaden singt, man bi allerhand lüttje Aarden könnt minschliche Ohren dat nich hören. Singzikaden suugt an Planten. Meist suugt se dor Xylem oder Phloem ut. Allerhand Bakterien un Swämme leevt in en Symbiose binnen in de Deerter un maakt dat eerst mööglich, datt de Plantenssapp verdaut weert kann. De wecken Aarden geevt Honnigdau af un leevt in en Symbiose tohopen mit Iemecken.

Wie de Singzikaden indeelt weert

En Cicada orni. ut de Familie vun de Singzikaden (Cicadidae)

Böverfamilie Membracoidea mit düsse Familien:

• Cicadellidae (= Jassidae, Lüttzikaden, mit de Blattzikaden dormank)
• Membracidae (Buckelzikaden)
• Aetalonidae (Verkehrte Buckelzikaden)
• Melizoderidae (Helmzikaden)
• Myerslopiidae (Mosszikaden)

Böverfamilie Cercopoidea mit düsse Familien (Systematik nah Strümpel 2010)

• Bloodzikaden (Cercopidae)
• Aphrophoridae (Schuumzikaden)
• Clastopteridae (Schildzikaden)
• Machaerotidae (Röhrenzikaden)

Böverfamilie Cicadoidea mit düsse Familien:

• Tettigarctidae (Pelzzikaden)
• Cicadidae (Echte Singzikaden)

Wie de Familie Epipygidae insorteert weern mutt, is noch undüütlich. Wohrschienlich höört se to de Schuumzikaden mit to.

Literatur

• G. Kunz: Zikaden - die Insekten des 21. Jahrhunderts? (Hemiptera, Auchenorrhyncha). Entomologica Austriaca 18, 105 - 123; 2011, pdf: