Fuchsijokwětny janowy krick (Ribes speciosum, nimski Fuchsienblütige Johannisbeere) jo kerk ze swójźby hendryškowych rostlinow (Grossulariaceae).
Fuchsijokwětny janowy krick jo w lěśu zeleny, śernjojty kerk, kótaryž dośěgnjo wusokosć a šyrokosć wót až do 2 m. Młode pšuśiki su cerwjene. Rostlina jo pśeśiwo mrozoju cuśiwa. Štapce dośěgnu dłujkosć wót 10 až do 20 mm.
Owalne łopjena su tśilapate až pěślapate, błyšćece zelene a dośěgnu wjelikosć wót 1 až 3,5 cm. Pśi tom rozkłony mjazy lapami su wuske. Jich wogonki dośěgnu dłujkosć wót 0,5 až do 2 cm. Jich baza jo klinata. Kšoma njaso małko płonych zubkow. Cypliški su kulowaśone.
Kwiśo w póznej zymje. Wuske, dołoj wisece kwiśonki su cerwjene, šyrše ako dłujke a stoje pó jadnom abo pó dweju až pó styrjoch w 2 až 7 cm dłujkich kisćach. Jich dłujke proškowe łopjeńka su cerwjene a dwójce až styri raz tak dłujke kaž kronowe łopjeńka. 4 cerwjene keluškowe łopjeńka su rowne a dośěgnu wjelikosć wót 6 až do 10 mm. 4 cerwjene kronowe łopjeńka su rowne a dłujkojte, maju nutś žwałkatu kšomu a dośěgnu wjelikosć wót 6 až do 10 mm. Gołe proškowe nitki su linealne a dośěgnjo dłujkosć wót 12 až do 40 mm. Owalne prošniki su wioletne abo cerwjene, njasu kulowaśony cyplišk a dośěgnu wjelikosć wót 2 mm.
Wusoke łopjeńka su šyroko-jajojte a dośěgnu dłujkosć wót 4 až do 8 mm. Kwiśonkowe wogonki dośěgnu dłujkosć wót 8 až do 12 mm.
Kulowate płody su cerwjene, gusto załzojśe šćeśinate a dośěgnu wjelikosć wót 10 až do 12 mm.
Póchada z Kaliforniskeje.
Fuchsijokwětny janowy krick (Ribes speciosum, nimski Fuchsienblütige Johannisbeere) jo kerk ze swójźby hendryškowych rostlinow (Grossulariaceae).
